بے خطر رنجش دل دار اٹھائی جائے

بے خطر رنجش دل دار اٹھائی جائے

جیسے دیوار پہ دیوار اٹھائی جائے

دشمنی اور بڑھانے کا ارادہ جو نہیں

رکھ کے کیوں پاؤں پہ دستار اٹھائی جائے

تھک گیا ہوں میں اٹھاتے ہوئے آوازوں کو

سوچتا ہوں کوئی تلوار اٹھائی جائے

روز وہ وصل کے بدلے میں الم دیتا ہے

کیوں نہ یہ خواہش بے کار اٹھائی جائے

تجھ کو بھی علم نہیں ہے کہ تری چوکھٹ پر

خلقت شہر ہے بیزار اٹھائی جائے

دوسری بار یقیں عشق پہ آتا ہے کسے

یہ قسم وہ ہے جو اک بار اٹھائی جائے

رش جو بڑھ جائے خریداریاں کم ہوتی ہیں

کچھ نہ کچھ رونق بازار اٹھائی جائے

بادبانوں کے سہاروں پہ رہو مت اعجازؔ

ہے ہوا بند تو پتوار اٹھائی جائے