be-KHatar ranjish-e-dildar uThai jae

be-ḳhatar ranjish-e-dildār uThā.ī jaa.e

jaise dīvār pe dīvār uThā.ī jaa.e

dushmanī aur baḌhāne kā irāda jo nahīñ

rakh ke kyoñ paañv pe dastār uThā.ī jaa.e

thak gayā huuñ maiñ uThāte hue āvāzoñ ko

sochtā huuñ koī talvār uThā.ī jaa.e

roz vo vasl ke badle meñ alam detā hai

kyoñ na ye ḳhvāhish-e-be-kār uThā.ī jaa.e

tujh ko bhī ilm nahīñ hai ki tirī chaukhaT par

ḳhilqat-e-shahr hai bezār uThā.ī jaa.e

dūsrī baar yaqīñ ishq pe aatā hai kise

ye qasam vo hai jo ik baar uThā.ī jaa.e

rush jo baḌh jaa.e ḳharīdāriyāñ kam hotī haiñ

kuchh na kuchh raunaq-e-bāzār uThā.ī jaa.e

bādbānoñ ke sahāroñ pe raho mat 'e.ajāz'

hai havā band to patvār uThā.ī jaa.e

be-KHatar ranjish-e-dildar uThai jae

jaise diwar pe diwar uThai jae

dushmani aur baDhane ka irada jo nahin

rakh ke kyon panw pe dastar uThai jae

thak gaya hun main uThate hue aawazon ko

sochta hun koi talwar uThai jae

roz wo wasl ke badle mein alam deta hai

kyon na ye KHwahish-e-be-kar uThai jae

tujh ko bhi ilm nahin hai ki teri chaukhaT par

KHilqat-e-shahr hai bezar uThai jae

dusri bar yaqin ishq pe aata hai kise

ye qasam wo hai jo ek bar uThai jae

rush jo baDh jae KHaridariyan kam hoti hain

kuchh na kuchh raunaq-e-bazar uThai jae

baadbanon ke sahaaron pe raho mat 'eajaz'

hai hawa band to patwar uThai jae