be-KHauf-e-ghair dil ki agar tarjuman na ho

be-ḳhauf-e-ġhair dil kī agar tarjumāñ na ho

behtar hai is se ye ki sire se zabāñ na ho

hoñ be-hirās ye mujhe rakkheñ kisī jagah

Dar ho vahāñ ki terī hukūmat jahāñ na ho

ik tū jo mehrbāñ ho to har ik ho mehrbāñ

aur yuuñ na ho balā se koī mehrbāñ na ho

ham ko to ek tujh se do aalam meñ hai ġharaz

sab bad-gumāñ huā kareñ tū bad-gumāñ na ho

dair o haram meñ DhūñD ke sab thak ga.e use

ab kaun kah sake ki kahāñ ho kahāñ na ho

karnā hī thā harām to phir vaada kis liye

ye kyā ki mai halāl vahāñ ho yahāñ na ho

himmat na haar de koī manzil ke sāmne

parvardigār yuuñ bhī koī nā-tavāñ na ho

milne to phir chale ho mashīḳhat panāh se

qashqa kā dekho aaj jabīñ par nishāñ na ho

'jauhar' is ek dil ke liye itne mashġhale

kī hai ḳhudā kī chaah to ishq-e-butāñ na ho

be-KHauf-e-ghair dil ki agar tarjuman na ho

behtar hai is se ye ki sire se zaban na ho

hon be-hiras ye mujhe rakkhen kisi jagah

Dar ho wahan ki teri hukumat jahan na ho

ek tu jo mehrban ho to har ek ho mehrban

aur yun na ho bala se koi mehrban na ho

hum ko to ek tujh se do aalam mein hai gharaz

sab bad-guman hua karen tu bad-guman na ho

dair o haram mein DhunD ke sab thak gae use

ab kaun kah sake ki kahan ho kahan na ho

karna hi tha haram to phir wada kis liye

ye kya ki mai halal wahan ho yahan na ho

himmat na haar de koi manzil ke samne

parwardigar yun bhi koi na-tawan na ho

milne to phir chale ho mashiKHat panah se

qashqa ka dekho aaj jabin par nishan na ho

'jauhar' is ek dil ke liye itne mashghale

ki hai KHuda ki chah to ishq-e-butan na ho