بے خیالی کی ردا دور تلک تانی ہے

بے خیالی کی ردا دور تلک تانی ہے

اب تو یہ بھی نہیں لگتا کہ پریشانی ہے

سرد موسم میں بھڑک اٹھی ہے تنہائی کی آگ

جو بڑھا دیتی ہے مشکل وہی آسانی ہے

آب گریہ سے ہے دیدار کی صورت پیدا

دیکھیے غور سے آنکھ آنکھ نہیں پانی ہے

میں تو احساس کی تصویر بنا بیٹھا ہوں

رونق بزم تصور مری حیرانی ہے

یہ جو دنیا ہے یہ دنیا کی بنائی ہوئی ہے

آدمی کیا ہے نظریات کی شیطانی ہے

یہ غزل سن کے کہیں گے قمر عباس قمرؔ

یار عباس قمرؔ تم نے عجب ٹھانی ہے