be-KHayali ki rida dur talak tani hai

be-ḳhayālī kī ridā duur talak taanī hai

ab to ye bhī nahīñ lagtā ki pareshānī hai

sard mausam meñ bhaḌak uTThī hai tanhā.ī kī aag

jo baḌhā detī hai mushkil vahī āsānī hai

āb-e-girya se hai dīdār kī sūrat paidā

dekhiye ġhaur se aañkh aañkh nahīñ paanī hai

maiñ to ehsās kī tasvīr banā baiThā huuñ

raunaq-e-bazm-e-tasavvur mirī hairānī hai

ye jo duniyā hai ye duniyā kī banā.ī huī hai

aadmī kyā hai nazariyāt kī shaitānī hai

ye ġhazal sun ke kaheñge ‘qamar-abbās-qamar'

yaar 'abbās-qamar' tum ne 'ajab Thānī hai

be-KHayali ki rida dur talak tani hai

ab to ye bhi nahin lagta ki pareshani hai

sard mausam mein bhaDak uTThi hai tanhai ki aag

jo baDha deti hai mushkil wahi aasani hai

aab-e-girya se hai didar ki surat paida

dekhiye ghaur se aankh aankh nahin pani hai

main to ehsas ki taswir bana baiTha hun

raunaq-e-bazm-e-tasawwur meri hairani hai

ye jo duniya hai ye duniya ki banai hui hai

aadmi kya hai nazariyat ki shaitani hai

ye ghazal sun ke kahenge ‘qamar-abbas-qamar'

yar 'abbas-qamar' tum ne 'ajab Thani hai