بے خود ہیں تیرے جلوۂ توبہ شکن سے ہم

بے خود ہیں تیرے جلوۂ توبہ شکن سے ہم

ہیں بے نیاز بادۂ رنج و محن سے ہم

وہ بھی جنون عشق میں معدوم ہو گئے

جو نقش لے چلے تھے تری انجمن سے ہم

گلدستۂ بہار نے دل سے لگا لیا

باد خزاں کے ہاتھوں جو نکلے چمن سے ہم

ملتے تھے پہلے شوق کو صحرا نئے نئے

اب تو جنوں میں کھیلتے ہیں پیرہن سے ہم

ہر بوالہوس کو دعوئ منصور ہو گیا

اب جاں بہ لب ہیں نعرۂ دار و رسن سے ہم

قدریں بھی حوصلے بھی مسائل بھی عشق بھی

زلف غزل سجاتے ہیں کس بانکپن سے ہم

دل کیا گیا کلیمؔ گئیں گلفشانیاں

الجھے ہوئے ہیں دامن خار وطن سے ہم