be-KHud hain tere jalwa-e-tauba-shikan se hum

be-ḳhud haiñ tere jalva-e-tauba-shikan se ham

haiñ be-niyāz bāda-e-ranj-o-mehan se ham

vo bhī junūn-e-ishq meñ mādūm ho ga.e

jo naqsh le chale the tirī anjuman se ham

guldasta-e-bahār ne dil se lagā liyā

bād-e-ḳhizāñ ke hāthoñ jo nikle chaman se ham

milte the pahle shauq ko sahrā na.e na.e

ab to junūñ meñ khelte haiñ pairahan se ham

har bul-havas ko da.avā-e-mansūr ho gayā

ab jāñ-ba-lab haiñ na.ara-e-dār-o-rasan se ham

qadreñ bhī hausle bhī masā.il bhī ishq bhī

zulf-e-ġhazal sajāte haiñ kis bāñkpan se ham

dil kyā gayā 'kalīm' ga.iiñ guf-fishāniyāñ

uljhe hue haiñ dāman-e-ḳhār-e-vatan se ham

be-KHud hain tere jalwa-e-tauba-shikan se hum

hain be-niyaz baada-e-ranj-o-mehan se hum

wo bhi junun-e-ishq mein madum ho gae

jo naqsh le chale the teri anjuman se hum

guldasta-e-bahaar ne dil se laga liya

baad-e-KHizan ke hathon jo nikle chaman se hum

milte the pahle shauq ko sahra nae nae

ab to junun mein khelte hain pairahan se hum

har bul-hawas ko dawa-e-mansur ho gaya

ab jaan-ba-lab hain nara-e-dar-o-rasan se hum

qadren bhi hausle bhi masail bhi ishq bhi

zulf-e-ghazal sajate hain kis bankpan se hum

dil kya gaya 'kalim' gain guf-fishaniyan

uljhe hue hain daman-e-KHar-e-watan se hum