be-KHudi mein teri qurbat ke zamane dekhe

be-ḳhudī meñ tirī qurbat ke zamāne dekhe

tujh se vābasta ka.ī ḳhvāb suhāne dekhe

ham ne tahrīr kiye the jo lahū se apne

vus.at-e-arz pe bikhre vo fasāne dekhe

tujh ko mahsūs to har shai meñ kiyā hai ham ne

tujh ko dekhā na kahīñ tere Thikāne dekhe

sirf ik tere chamakte hue chehre ke sivā

shīsha-e-dil meñ sabhī aks purāne dekhe

daur-e-hāzir kī har ik shai se hue duur bahut

ham ne jab guzre hue apne zamāne dekhe

va.ada karke bhī na aane kī hasīñ bātoñ meñ

ham ne us shoḳh parī-rū ke bahāne dekhe

be-KHudi mein teri qurbat ke zamane dekhe

tujh se wabasta kai KHwab suhane dekhe

hum ne tahrir kiye the jo lahu se apne

wusat-e-arz pe bikhre wo fasane dekhe

tujh ko mahsus to har shai mein kiya hai hum ne

tujh ko dekha na kahin tere Thikane dekhe

sirf ek tere chamakte hue chehre ke siwa

shisha-e-dil mein sabhi aks purane dekhe

daur-e-hazir ki har ek shai se hue dur bahut

hum ne jab guzre hue apne zamane dekhe

wada karke bhi na aane ki hasin baaton mein

hum ne us shoKH pari-ru ke bahane dekhe