be-laus hon rishte to bhulae nahin jate

be-laus hoñ rishte to bhulā.e nahīñ jaate

fānūs sar-e-shām bujhā.e nahīñ jaate

āñkhoñ kā ye chashma bhī huā ḳhushk mire dost

bekār meñ ab ashk bahā.e nahīñ jaate

hotī haiñ tabī.at meñ ka.ī bāñjh zamīneñ

phal jin pe mohabbat ke ugaa.e nahīñ jaate

kuchh lafz adā chaah ke hote nahīñ ham se

kuchh vāqiye likh kar bhī sunā.e nahīñ jaate

ab mujh ko tire qurb kī ḳhvāhish hī nahīñ hai

ab mujh se tire naaz uThā.e nahīñ jaate

ho jaate haiñ yādoñ ke darīchoñ meñ muqayyad

kuchh log suhūlat se bhulā.e nahīñ jaate

ham faqr ke tālib haiñ so mahbūb hai yaktā

sar ham se har ik dar pe jhukā.e nahīñ jaate

ho jaatā huuñ sairāb safar kar ke maiñ in meñ

ḳhvāboñ ke mahal mujh se girā.e nahīñ jaate

be-laus hon rishte to bhulae nahin jate

fanus sar-e-sham bujhae nahin jate

aankhon ka ye chashma bhi hua KHushk mere dost

bekar mein ab ashk bahae nahin jate

hoti hain tabiat mein kai banjh zaminen

phal jin pe mohabbat ke ugae nahin jate

kuchh lafz ada chah ke hote nahin hum se

kuchh waqiye likh kar bhi sunae nahin jate

ab mujh ko tere qurb ki KHwahish hi nahin hai

ab mujh se tere naz uThae nahin jate

ho jate hain yaadon ke darichon mein muqayyad

kuchh log suhulat se bhulae nahin jate

hum faqr ke talib hain so mahbub hai yakta

sar hum se har ek dar pe jhukae nahin jate

ho jata hun sairab safar kar ke main in mein

KHwabon ke mahal mujh se girae nahin jate