be-mehri-e-wafa ne puchho na kya diya hai

be-mehrī-e-vafā ne pūchho na kyā diyā hai

āh-e-vidā-e-shab ne siina jalā diyā hai

nālā-kanāñ haiñ bulbul bhañvaroñ meñ be-dilī hai

ab ke vo bijliyoñ ne gulshan jalā diyā hai

baazī pe apne sar kī ik husn-e-be-badal se

ham ne mohabbatoñ kā na.ara lagā diyā hai

andhī mohabbatoñ ne har sāhab-e-vafā ko

dariyā dikhā diyā hai sahrā dikhā diyā hai

phirte idhar udhar haiñ logo makāñ-ba-sar haiñ

muddat se chain apnā ham ne gañvā diyā hai

lahreñ uchhal paḌīñ haiñ ik nāznīñ ne apne

paanī meñ paañv rakh kar mahshar uThā diyā hai

jis ko bhī sauñp Daalā 'ādil' nizām dil kā

mushkil usī ne merā jiinā banā diyā hai

be-mehri-e-wafa ne puchho na kya diya hai

aah-e-wida-e-shab ne sina jala diya hai

nala-kanan hain bulbul bhanwaron mein be-dili hai

ab ke wo bijliyon ne gulshan jala diya hai

bazi pe apne sar ki ek husn-e-be-badal se

hum ne mohabbaton ka nara laga diya hai

andhi mohabbaton ne har sahab-e-wafa ko

dariya dikha diya hai sahra dikha diya hai

phirte idhar udhar hain logo makan-ba-sar hain

muddat se chain apna hum ne ganwa diya hai

lahren uchhal paDin hain ek naznin ne apne

pani mein panw rakh kar mahshar uTha diya hai

jis ko bhi saunp Dala 'adil' nizam dil ka

mushkil usi ne mera jina bana diya hai