بے مروت ہے زندگی کیسی

بے مروت ہے زندگی کیسی

پھر بھی اس سے یہ دوستی کیسی

آج محفل میں ہو گیا تنہا

سچ کی عادت یہ پڑ گئی کیسی

دن نکلتا ہے رات ہوتی ہے

اور ہوتی ہے زندگی کیسی

اگلے دم کا پتا نہیں لیکن

بات کرتا ہے آدمی کیسی

اک ذرا سے مفاد کی خاطر

دم ہلاتا ہے آدمی کیسی

زخم کھایا تو یہ سمجھ آیا

دنیا ہوتی ہے مطلبی کیسی

میرے لٹنے کی داستاں سن کر

تیرے لہجے میں بے رخی کیسی

ایسے مکار دور میں وامقؔ

تیرے چہرے پہ سادگی کیسی