be-niyaz-e-har-tamanna ho gaya

be-niyāz-e-har-tamannā ho gayā

ishq meñ ab husn paidā ho gayā

dard-e-dil ḳhud hī masīhā ho gayā

mar gayā bīmār achchhā ho gayā

dil meñ koī to adā-e-ḳhās thī

jalva ḳhud mahv-e-tamāshā ho gayā

ai nigāh-e-lutf parda chāhiye

soz-e-dil sāz-e-tamannā ho gayā

merī ḳhāmoshī fasāna ban ga.ī

ḳhud lab-e-ḳhāmosh goyā ho gayā

pā.emālī meñ nihāñ thī zindagī

dil miTā miT kar tamannā ho gayā

sāmne haiñ aur nazar aate nahīñ

jalva ḳhud āñkhoñ kā parda ho gayā

is adā se aaj uTThī vo nazar

maiñ bharī mahfil meñ rusvā ho gayā

muskurā kar tum ne kyoñ dekhā mujhe

bijliyoñ ko ik bahāna ho gayā

is tarah jalva dikhāte haiñ kahīñ

har tamāshā.ī tamāshā ho gayā

ho ga.ī ḳhāmosh sham-e-zindagī

ḳhatm sab dil kā fasāna ho gayā

jo girā dāman pe aañsū ai 'munīr'

ā.ina-dār-e-tamannā ho gayā

be-niyaz-e-har-tamanna ho gaya

ishq mein ab husn paida ho gaya

dard-e-dil KHud hi masiha ho gaya

mar gaya bimar achchha ho gaya

dil mein koi to ada-e-KHas thi

jalwa KHud mahw-e-tamasha ho gaya

ai nigah-e-lutf parda chahiye

soz-e-dil saz-e-tamanna ho gaya

meri KHamoshi fasana ban gai

KHud lab-e-KHamosh goya ho gaya

paemali mein nihan thi zindagi

dil miTa miT kar tamanna ho gaya

samne hain aur nazar aate nahin

jalwa KHud aankhon ka parda ho gaya

is ada se aaj uTThi wo nazar

main bhari mahfil mein ruswa ho gaya

muskura kar tum ne kyon dekha mujhe

bijliyon ko ek bahana ho gaya

is tarah jalwa dikhate hain kahin

har tamashai tamasha ho gaya

ho gai KHamosh sham-e-zindagi

KHatm sab dil ka fasana ho gaya

jo gira daman pe aansu ai 'munir'

aaina-dar-e-tamanna ho gaya