بے پردہ ہو کے جب وہ لب بام آ گیا

بے پردہ ہو کے جب وہ لب بام آ گیا

آنکھوں پہ میری دید کا الزام آ گیا

تا صبح کروٹیں ہی بدلتے رہیں گے ہم

ان کا اگر خیال سر شام آ گیا

بیباکیوں پہ ان کی کسی نے نظر نہ کی

میری نگاہ شوق پہ الزام آ گیا

اس دور میں بہت ہی غنیمت کہو اسے

دکھ میں اگر کسی کے کوئی کام آ گیا

کتنی ہماری عمر محبت تھی مختصر

آغاز ہی کیا تھا کہ انجام آ گیا

دنیا کے غم بھی ہم نے اسی میں ڈبو دئے

امجدؔ نگاہ ناز کا جب جام آ گیا