be-parda us ka chehra-e-pur-nur to hua

be-parda us kā chehra-e-pur-nūr to huā

kuchh der sho.abada sā sar-e-tūr to huā

achchhā kiyā ki maiñ ne kiyā tark-e-ārzū

be-sabr dil ko sabr kā maqdūr to huā

go us meñ ab nahīñ haiñ laḌakpan kī shoḳhiyāñ

lekin shabāb aane se maġhrūr to huā

ab aur iltifāt se maqsad hai kyā tirā

bas ai nigāh-e-mast ki maiñ chuur to huā

tum ne agar sunā nahīñ ye aur baat hai

afsāna mere ishq kā mash.hūr to huā

suntā huuñ husn mā.il-e-mehr-o-vafā hai ab

ai iḳhtiyār-e-ishq vo majbūr to huā

'shākir' ko hai nasīb se kis baat kā gilā

duniyā-e-shā.irī meñ vo mash.hūr to huā

be-parda us ka chehra-e-pur-nur to hua

kuchh der shoabada sa sar-e-tur to hua

achchha kiya ki main ne kiya tark-e-arzu

be-sabr dil ko sabr ka maqdur to hua

go us mein ab nahin hain laDakpan ki shoKHiyan

lekin shabab aane se maghrur to hua

ab aur iltifat se maqsad hai kya tera

bas ai nigah-e-mast ki main chur to hua

tum ne agar suna nahin ye aur baat hai

afsana mere ishq ka mashhur to hua

sunta hun husn mail-e-mehr-o-wafa hai ab

ai iKHtiyar-e-ishq wo majbur to hua

'shakir' ko hai nasib se kis baat ka gila

duniya-e-shairi mein wo mashhur to hua