be-qarari dil-e-muztar ki baDhai humne

be-qarārī dil-e-muztar kī baḌhā.ī ham ne

aaj phir tum se koī aas lagā.ī ham ne

mushkileñ rāh-e-vafā meñ bhī banā.īñ āsāñ

rasm-e-ulfat to ba-har-taur nibhā.ī ham ne

shāyad aa jaao kisī roz kabhī lauT ke tum

bas usī aas meñ har raah sajā.ī ham ne

tum kabhī the na hamāre na kabhī hoge sanam

ye samajhne meñ bahut der lagā.ī ham ne

haa.e dil-kash vo adā.eñ vo dil-āvez nazar

jin meñ uljhe rahe aur 'umr gañvā.ī ham ne

koī shikva na shikāyat na gila hai tum se

apne hī haath se hastī bhī miTā.ī ham ne

rahne vaale haiñ 'sabā' 'arsh-e-barīñ ke vo to

kahkashāñ phir bhī sar-e-farsh bichā.ī ham ne

be-qarari dil-e-muztar ki baDhai hum ne

aaj phir tum se koi aas lagai hum ne

mushkilen rah-e-wafa mein bhi banain aasan

rasm-e-ulfat to ba-har-taur nibhai hum ne

shayad aa jao kisi roz kabhi lauT ke tum

bas usi aas mein har rah sajai hum ne

tum kabhi the na hamare na kabhi hoge sanam

ye samajhne mein bahut der lagai hum ne

hae dil-kash wo adaen wo dil-awez nazar

jin mein uljhe rahe aur 'umr ganwai hum ne

koi shikwa na shikayat na gila hai tum se

apne hi hath se hasti bhi miTai hum ne

rahne wale hain 'saba' 'arsh-e-barin ke wo to

kahkashan phir bhi sar-e-farsh bichai hum ne