be-qarari ho magar phir bhi qarar aa jae

be-qarārī ho magar phir bhī qarār aa jaa.e

vo palaT kar bhī jo dekhe to bahār aa jaa.e

guftugū aisī karo dil ko qarār aa jaa.e

jaise vīrāne meñ chupke se bahār aa jaa.e

kyoñ nazar aa.e bhalā aks-e-mohabbat us meñ

dil ke shīshe pe agar gard-o-ġhubār aa jaa.e

terī āñkhoñ meñ hai bañgāl kā jaadū ab bhī

tū jahāñ dekhe vahāñ terā shikār aa jaa.e

maut se Darne kā mar jā.egā ehsās agar

zindagī phir tire chehre pe nikhār aa jaa.e

tum aqīdat kī sharāboñ kā nasha kyā jaano

ham tasavvur bhī jo kar leñ to ḳhumār aa jaa.e

phuul se chehre pe Thahre hue aañsū 'shātir'

koī dushman bhī agar dekhe to pyaar aa jaa.e

be-qarari ho magar phir bhi qarar aa jae

wo palaT kar bhi jo dekhe to bahaar aa jae

guftugu aisi karo dil ko qarar aa jae

jaise virane mein chupke se bahaar aa jae

kyon nazar aae bhala aks-e-mohabbat us mein

dil ke shishe pe agar gard-o-ghubar aa jae

teri aankhon mein hai bangal ka jadu ab bhi

tu jahan dekhe wahan tera shikar aa jae

maut se Darne ka mar jaega ehsas agar

zindagi phir tere chehre pe nikhaar aa jae

tum aqidat ki sharabon ka nasha kya jaano

hum tasawwur bhi jo kar len to KHumar aa jae

phul se chehre pe Thahre hue aansu 'shatir'

koi dushman bhi agar dekhe to pyar aa jae