بے رخی دیر تک نہیں رہتی

بے رخی دیر تک نہیں رہتی

برہمی دیر تک نہیں رہتی

وصل کے بعد ہجر آتا ہے

دل کشی دیر تک نہیں رہتی

یار سورج غروب پھر ہوگا

روشنی دیر تک نہیں رہتی

عاشقی دیر تک تو رہتی ہے

زندگی دیر تک نہیں رہتی

بات یہ ہے کہ دل کے دریا میں

جل پری دیر تک نہیں رہتی

زخم دل رہتا ہے ہمیشہ ہرا

بے حسی دیر تک نہیں رہتی

باتیں دانائی کی وہ کرتا ہے

کم سنی دیر تک نہیں رہتی

دوستو قطب شہ کے کمرے میں

مشتری دیر تک نہیں رہتی

تخت پل میں الٹتے ہیں بسملؔ

خسروی دیر تک نہیں رہتی

جب بھی آتی ہے میرے حجرے میں

وہ کبھی دیر تک نہیں رہتی

میں ہی ہوں کل کا ماتمی بسملؔ

خوش دلی دیر تک نہیں رہتی