be-ruKHi hai ki taghaful hai saza hai kya hai

be-ruḳhī hai ki taġhāful hai sazā hai kyā hai

mehrbāñ ġhair pe kyoñ itnā huā hai kyā hai

mere aane se faqat bazm sarāsīma hai kyoñ

aaj mahfil meñ jo ik shor bapā hai kyā hai

jaam auqāt se zaa.id nahīñ detā hai na de

sāqiyā kuchh bhī na dene pe tulā hai kyā hai

'ishq se qabl na samjhā thā jo ab samjhā huuñ

shaiḳh sāhib ne jo irshād kiyā hai kyā hai

shauq kahtā thā ki sab qaid karegā manzar

taab jalvoñ kī magar lā na sakā hai kyā hai

naam le kar jo sar-e-bazm pukārā un ko

har koī chīḳh uThā boliye kyā hai kyā hai

jang jaarī hai musalsal mire andar 'ahmar'

'ājizī hai ki tamāshā hai anā hai kyā hai

be-ruKHi hai ki taghaful hai saza hai kya hai

mehrban ghair pe kyon itna hua hai kya hai

mere aane se faqat bazm sarasima hai kyon

aaj mahfil mein jo ek shor bapa hai kya hai

jam auqat se zaid nahin deta hai na de

saqiya kuchh bhi na dene pe tula hai kya hai

'ishq se qabl na samjha tha jo ab samjha hun

shaiKH sahib ne jo irshad kiya hai kya hai

shauq kahta tha ki sab qaid karega manzar

tab jalwon ki magar la na saka hai kya hai

nam le kar jo sar-e-bazm pukara un ko

har koi chiKH uTha boliye kya hai kya hai

jang jari hai musalsal mere andar 'ahmar'

'ajizi hai ki tamasha hai ana hai kya hai