be-sabab ai dil-e-nadan kahin lauTa to nahin

be-sabab ai dil-e-nādāñ kahīñ lauTā to nahīñ

us ne āvāz hī dī hai tujhe rokā to nahīñ

zarā chehre se naqāb utre to ham bhī dekheñ

kahīñ talbīs ke pīchhe nayā chehra to nahīñ

tum ne ḳhvāboñ kī tijārat bhalā kaise kī hai

ishq lāhiq ho jise vo kabhī sotā to nahīñ

shahr-e-āshob ke hāthoñ meñ haiñ patthar kyūñkar

hai janāza sar-e-bāzār tamāsha to nahīñ

tum jo kahte ho nikal jaatā huuñ maiñ chup kar ke

dil hī hai nūh-nabī kā ye safīna to nahīñ

is meñ shāmil hai raqīboñ kī bhī kuchh sāzish sī

lauh-e-taqdīr pe ye hijr navishta to nahīñ

dil-ba-dar kar to rahe ho mujhe par yaad rahe

maiñ abūzar to nahīñ aur ye madīna to nahīñ

har ghaḌī dil se lagā.e hue rahte ho use

us kī tahrīr hai bas koī sahīfa to nahīñ

jis se bhī haath milāyā hai vo pur-josh milā

jis meñ rahtā huuñ maiñ 'zamzam' kahīñ kuufa to nahīñ

be-sabab ai dil-e-nadan kahin lauTa to nahin

us ne aawaz hi di hai tujhe roka to nahin

zara chehre se naqab utre to hum bhi dekhen

kahin talbis ke pichhe naya chehra to nahin

tum ne KHwabon ki tijarat bhala kaise ki hai

ishq lahiq ho jise wo kabhi sota to nahin

shahr-e-ashob ke hathon mein hain patthar kyunkar

hai janaza sar-e-bazar tamasha to nahin

tum jo kahte ho nikal jata hun main chup kar ke

dil hi hai nuh-nabi ka ye safina to nahin

is mein shamil hai raqibon ki bhi kuchh sazish si

lauh-e-taqdir pe ye hijr nawishta to nahin

dil-ba-dar kar to rahe ho mujhe par yaad rahe

main abuzar to nahin aur ye madina to nahin

har ghaDi dil se lagae hue rahte ho use

us ki tahrir hai bas koi sahifa to nahin

jis se bhi hath milaya hai wo pur-josh mila

jis mein rahta hun main 'zamzam' kahin kufa to nahin