بے سبب ہی جانے کس کس کو خفا کرتے رہے

بے سبب ہی جانے کس کس کو خفا کرتے رہے

کیوں کسی کے روبرو ہم آئنہ کرتے رہے

لوگ تدبیروں سے ہنگامے بپا کرتے رہے

اور ہم جبر مشیت کا گلہ کرتے رہے

وائے مجبوری کہ ہونٹوں پر نہ آئی دل کی بات

لاکھ ہم سعیٔ بیان مدعا کرتے رہے

غالباً یہ بھی ہمارا امتحاں تھا بزم میں

لوگ رہ رہ کر تمہارا تذکرہ کرتے رہے

ان کی خاطر اس تکلف کی کسی کو کیا خبر

کس لئے اپنے لہو کو ہم حنا کرتے رہے

ہر نفس کے ساتھ جوں جوں عمر کم ہوتی گئی

مختصر ہم زندگی کا راستہ کرتے رہے

اور بھی دشوار اب خود کو سمجھنا ہو گیا

ہوش کے عالم سے افضلؔ ہم بھی کیا کرتے رہے