be-sabab hi koi patthar to na aaya hoga

be-sabab hī koī patthar to na aayā hogā

ā.īna aap ne auroñ ko dikhāyā hogā

vo dīvāna jo mohabbat se shanāsā hogā

us ne is raah meñ kyā kuchh na luTāyā hogā

dasht pahle kī tarah aaj bhī pyāsā hogā

abr barsā bhī to dariyāoñ pe barsā hogā

qahqaha baar thā jo shaḳhs bharī mahfil meñ

aa ke tanhā.ī meñ kuchh soch ke royā hogā

haal gulshan kā asīrān-e-qafas kyā jāneñ

ai sabā tū hī batā tū ne to dekhā hogā

kaun is dhuup meñ kamre se nikaltā 'anvar'

jis ko chalnā thā kaḌī dhuup meñ chaltā hogā

be-sabab hi koi patthar to na aaya hoga

aaina aap ne auron ko dikhaya hoga

wo diwana jo mohabbat se shanasa hoga

us ne is rah mein kya kuchh na luTaya hoga

dasht pahle ki tarah aaj bhi pyasa hoga

abr barsa bhi to dariyaon pe barsa hoga

qahqaha bar tha jo shaKHs bhari mahfil mein

aa ke tanhai mein kuchh soch ke roya hoga

haal gulshan ka asiran-e-qafas kya jaanen

ai saba tu hi bata tu ne to dekha hoga

kaun is dhup mein kamre se nikalta 'anwar'

jis ko chalna tha kaDi dhup mein chalta hoga