be-sada kyunkar hua be-dast-o-pa kyunkar hua

be-sadā kyūñkar huā be-dast-o-pā kyūñkar huā

maiñ qafas meñ bhī na thā phir bhī rihā kyūñkar huā

āshnā jitne bhī the nā-āshnā kyūñkar hue

hādisa ye bhī huā kaise huā kyūñkar huā

sub.h kī pahlī kiran mehr-e-munavvar kab huī

har bagūla mauja-e-bād-e-sabā kyūñkar huā

bām-o-dar par jā-ba-jā parchhā.iyoñ ke aks the

ghar kā ye manzar bhī lekin ḳhushnumā kyūñkar huā

Dūbnā Thahrā to phir kachche ghaḌe kī shart kyā

vo sadā kā sañg-dil dard-āshnā kyūñkar huā

sho.abada-bāzī kahāñ kār-e-masīhā.ī huī

aadmī jab aadmī Thahrā ḳhudā kyūñkar huā

ḳhāmushī kitne hī jazboñ kā pata detī rahī

naala gar pāband-e-nai thā nā-rasā kyūñkar huā

be-sada kyunkar hua be-dast-o-pa kyunkar hua

main qafas mein bhi na tha phir bhi riha kyunkar hua

aashna jitne bhi the na-ashna kyunkar hue

hadisa ye bhi hua kaise hua kyunkar hua

subh ki pahli kiran mehr-e-munawwar kab hui

har bagula mauja-e-baad-e-saba kyunkar hua

baam-o-dar par ja-ba-ja parchhaiyon ke aks the

ghar ka ye manzar bhi lekin KHushnuma kyunkar hua

Dubna Thahra to phir kachche ghaDe ki shart kya

wo sada ka sang-dil dard-ashna kyunkar hua

shoabada-bazi kahan kar-e-masihai hui

aadmi jab aadmi Thahra KHuda kyunkar hua

KHamushi kitne hi jazbon ka pata deti rahi

nala gar paband-e-nai tha na-rasa kyunkar hua