be-samjhe-bujhe mohabbat ki ek kafir ne iman liya

be-samjhe-būjhe mohabbat kī ik kāfir ne īmān liyā

ab aaTh aaTh aañsū rote haiñ kyuuñ dil kā kahnā maan liyā

ham fikr meñ the chhup kar dekheñ un jalvoñ ne pahchān liyā

jab tak ye nazar uTThe uTThe zālim ne parda taan liyā

kyuuñ husn-e-garāñ-māya ye kyā tere jalve itne arzāñ

ek ek ḳhudā apnā apnā jis ne jise chāhā maan liyā

jis par sadqe donoñ aalam us ashk kī qīmat kyā kahiye

palkoñ par apnī tol chuke dāman meñ kisī ke chhān liyā

ye koh-e-girāñ hilte haiñ kahīñ aur phir mazbūt irādoñ ke

patthar kī lakīr hai ai nāseh jo ham ne dil meñ Thaan liyā

jalva ki fareb-e-jalva thā jo ho tasvīr mukammal thī

ik shor uThā har jānib se pahchān liyā pahchān liyā

mujh se to kisī se bair na thā duniyā mire ḳhuun kī pyāsī hai

maqtal kī taraf se jo guzrā ik haath lahū meñ saan liyā

hoñToñ pe banāvaT kī vo hañsī fariyād kā aalam sāñsoñ meñ

zālim kī mohabbat chhup na sakī jis ne dekhā pahchān liyā

barsoñ uljhe arbāb-e-ḳhirad ye ek girah ab tak na khulī

sar aap hī jhuk ga.e sajde meñ ghabrā ke ḳhudā ko maan liyā

marnā ho 'sirāj' ki jiinā ho be-minnat-e-ġhair ho jo kuchh ho

kyā rah ga.ī ḳhanjar-e-qātil kā gardan pe agar ehsān liyā

be-samjhe-bujhe mohabbat ki ek kafir ne iman liya

ab aaTh aaTh aansu rote hain kyun dil ka kahna man liya

hum fikr mein the chhup kar dekhen un jalwon ne pahchan liya

jab tak ye nazar uTThe uTThe zalim ne parda tan liya

kyun husn-e-garan-maya ye kya tere jalwe itne arzan

ek ek KHuda apna apna jis ne jise chaha man liya

jis par sadqe donon aalam us ashk ki qimat kya kahiye

palkon par apni tol chuke daman mein kisi ke chhan liya

ye koh-e-giran hilte hain kahin aur phir mazbut iradon ke

patthar ki lakir hai ai naseh jo hum ne dil mein Than liya

jalwa ki fareb-e-jalwa tha jo ho taswir mukammal thi

ek shor uTha har jaanib se pahchan liya pahchan liya

mujh se to kisi se bair na tha duniya mere KHun ki pyasi hai

maqtal ki taraf se jo guzra ek hath lahu mein san liya

honTon pe banawaT ki wo hansi fariyaad ka aalam sanson mein

zalim ki mohabbat chhup na saki jis ne dekha pahchan liya

barson uljhe arbab-e-KHirad ye ek girah ab tak na khuli

sar aap hi jhuk gae sajde mein ghabra ke KHuda ko man liya

marna ho 'siraj' ki jina ho be-minnat-e-ghair ho jo kuchh ho

kya rah gai KHanjar-e-qatil ka gardan pe agar ehsan liya