be-sar-o-saman kuchh apni taba se hain ghar mein hum

be-sar-o-sāmāñ kuchh apnī tab.a se haiñ ghar meñ ham

shahr kahte haiñ jise haiñ us ke pas-manzar meñ ham

shaam Duubī paḌ rahe sūraj ke dar par shab kī shab

sub.h bikhrī chal paḌe ḳhud ko liye Thokar meñ ham

āgahī tū ne hameñ kin vus.atoñ meñ gum kiyā

be-nishāñ har mulk meñ be-āsrā har ghar meñ ham

apne hī sahrā meñ kho jā.eñge andāza na thā

bāzgasht apnī liye phirte haiñ apne sar meñ ham

sātveñ dar tak pukār aa.ī ḳhudī ko be-ḳhudī

aur har dar se javāb aayā nahīñ haiñ ghar meñ ham

terī dastak thī ki sannāTā vahī har shaam kā

rahrav-e-koh-e-nidā haiñ ghar ke bām-o-dar meñ ham

chār-sū sahrā meñ hai dard-e-anassahrā kī guuñj

kaaT kar apnī zabāñ rakh aa.e the patthar meñ ham

chhān ye sahrā ghuTī haiñ is kī chauhad meñ sadā.eñ

kaaT ye parbat dabe haiñ is kī ḳhākistar meñ ham

ab hameñ bhātā nahīñ paiham sadāoñ kā nuzūl

ab to ḳhud gūñje hue haiñ gumbad-e-be-dar meñ ham

kiyāñ makāñ taakā hai dil ne raat aur din se pare

be-zabāñ hote chale haiñ qaid-e-bām-o-dar meñ ham

jaane is rah-rav kī nazreñ kaun sī manzil pe hoñ

ek kāñTā sā khaTakte haiñ dil-e-rahbar meñ ham

zahr kā pyāla ho piinā yā uThānī ho salīb

sadiyoñ ba.ad aa.eñ magar hote haiñ is manzar meñ ham

dasht-dar-dasht āsmāñ-bar-dosh chalte haiñ 'shahāb'

ham se banjāre janm apnā liye Thokar meñ ham

be-sar-o-saman kuchh apni taba se hain ghar mein hum

shahr kahte hain jise hain us ke pas-manzar mein hum

sham Dubi paD rahe suraj ke dar par shab ki shab

subh bikhri chal paDe KHud ko liye Thokar mein hum

aagahi tu ne hamein kin wusaton mein gum kiya

be-nishan har mulk mein be-asra har ghar mein hum

apne hi sahra mein kho jaenge andaza na tha

bazgasht apni liye phirte hain apne sar mein hum

satwen dar tak pukar aai KHudi ko be-KHudi

aur har dar se jawab aaya nahin hain ghar mein hum

teri dastak thi ki sannaTa wahi har sham ka

rahraw-e-koh-e-nida hain ghar ke baam-o-dar mein hum

chaar-su sahra mein hai dard-e-anassahra ki gunj

kaT kar apni zaban rakh aae the patthar mein hum

chhan ye sahra ghuTi hain is ki chauhad mein sadaen

kaT ye parbat dabe hain is ki KHakistar mein hum

ab hamein bhata nahin paiham sadaon ka nuzul

ab to KHud gunje hue hain gumbad-e-be-dar mein hum

kiyan makan taka hai dil ne raat aur din se pare

be-zaban hote chale hain qaid-e-baam-o-dar mein hum

jaane is rah-raw ki nazren kaun si manzil pe hon

ek kanTa sa khaTakte hain dil-e-rahbar mein hum

zahr ka pyala ho pina ya uThani ho salib

sadiyon baad aaen magar hote hain is manzar mein hum

dasht-dar-dasht aasman-bar-dosh chalte hain 'shahab'

hum se banjare janm apna liye Thokar mein hum