be-shakl shabahat hai be-rabt sarapa hai

be-shakl shabāhat hai be-rabt sarāpā hai

jazbāt bhī jāmid haiñ ehsās bhī tishna hai

bahtā huā dariyā hai uThtī huī maujeñ haiñ

sadiyoñ kī masāfat meñ lamhoñ kā tamāshā hai

tahzīb kā sannāTā sākin hai yahāñ shāyad

vīrān havelī kī dahlīz pe parda hai

uljhe hue insāñ kī tasvīr bhī uljhī hai

āñkhoñ meñ añdherā hai chehra pe ujālā hai

manzar ke tanāzur tak kis tarah rasā.ī ho

nazroñ se bhī aage hai āñkhoñ se bhī gahrā hai

ye lamha mirī shab kā kitnā hī muqaddas hai

jismoñ ko milātā hai rūhoñ ko jagātā hai

saa.e ke ta.āqub meñ masrūf hai roz-o-shab

ham-zād mirā 'shāhid' auhām kā maarā hai

be-shakl shabahat hai be-rabt sarapa hai

jazbaat bhi jamid hain ehsas bhi tishna hai

bahta hua dariya hai uThti hui maujen hain

sadiyon ki masafat mein lamhon ka tamasha hai

tahzib ka sannaTa sakin hai yahan shayad

viran haweli ki dahliz pe parda hai

uljhe hue insan ki taswir bhi uljhi hai

aankhon mein andhera hai chehra pe ujala hai

manzar ke tanazur tak kis tarah rasai ho

nazron se bhi aage hai aankhon se bhi gahra hai

ye lamha meri shab ka kitna hi muqaddas hai

jismon ko milata hai ruhon ko jagata hai

sae ke taaqub mein masruf hai roz-o-shab

ham-zad mera 'shahid' auham ka mara hai