be-shauq-e-talab be-zauq-e-nazar be-rang thi unki gul-badani

be-shauq-e-talab be-zauq-e-nazar be-rañg thī un kī gul-badanī

ye kohkan-o-majnūñ kī nazar shīrīñ bhī banī lailā bhī banī

dekhe hue un ko der huī har naqsh abhī tak taaza hai

be-gāna-vashī mastāna-ravī jādū-nazarī shīrīñ-suḳhanī

ham apne hī ghar meñ rahte the jab terī nazar meñ rahte the

ab roz satātī hai ham ko ai dost vatan meñ be-vatanī

phūloñ meñ jhalakte haiñ chehre shāḳhoñ pe gumāñ āġhosh kā hai

kuchh aisī basī hai nazroñ meñ gul-pairahanī nāzuk-badanī

nazroñ meñ na be-mehrī kī adā bātoñ meñ na vo ḳhushbu-e-vafā

kitne hī diloñ ko toḌ ga.ī zālim kī jabīñ kī be-shikanī

us bazm-e-tarab meñ hañsne par majbūr hameñ qismat ne kiyā

phūloñ se jahāñ sho.ale lapkeñ sāġhar meñ ghule hiire kī kanī

sho.aloñ meñ nikharte haiñ jauhar qismat pe 'farīdī' tanz na kar

ġham aisī hī ne.amat hai jis ko paate haiñ yahāñ qismat ke dhanī

be-shauq-e-talab be-zauq-e-nazar be-rang thi un ki gul-badani

ye kohkan-o-majnun ki nazar shirin bhi bani laila bhi bani

dekhe hue un ko der hui har naqsh abhi tak taza hai

be-gana-washi mastana-rawi jadu-nazari shirin-suKHani

hum apne hi ghar mein rahte the jab teri nazar mein rahte the

ab roz satati hai hum ko ai dost watan mein be-watani

phulon mein jhalakte hain chehre shaKHon pe guman aaghosh ka hai

kuchh aisi basi hai nazron mein gul-pairahani nazuk-badani

nazron mein na be-mehri ki ada baaton mein na wo KHushbu-e-wafa

kitne hi dilon ko toD gai zalim ki jabin ki be-shikani

us bazm-e-tarab mein hansne par majbur hamein qismat ne kiya

phulon se jahan shoale lapken saghar mein ghule hire ki kani

shoalon mein nikharte hain jauhar qismat pe 'faridi' tanz na kar

gham aisi hi neamat hai jis ko pate hain yahan qismat ke dhani