be-sud hai guftar jo kirdar nahin hai

be-sūd hai guftār jo kirdār nahīñ hai

kirdār ho to hājat-e-guftār nahīñ hai

ai dil-jalo ye ashk yahāñ dekhtā hai kaun

ahl-e-jahāñ ko in se sarokār nahīñ hai

kyā jaane dard-e-dil ki ye duniyā hai sang-dil

ye dard yahāñ lā.eq-e-iz.hār nahīñ hai

kyuuñ apne dil meñ tum liye phirte ho muravvat

is kā jahāñ meñ koī ḳharīdār nahīñ hai

saarā jahāñ sameT le to phir bhī tere paas

kuchh bhī nahīñ jo ik dil-e-bedār nahīñ hai

duniyā meñ bahut lāzmī hai azm-e-musammam

ye ho to koī marhala dushvār nahīñ hai

dil meñ na dard ho to kahāñ shā'irī bhī ho

kyā dard hī sarmāya-e-ash.ār nahīñ hai

mazlūm kī har aah hilātī hai 'arsh ko

ye aah to jaatī kabhī be-kār nahīñ hai

insāniyat ke dard kā hai tarjumāñ bashīr

ye be-muravvatī kā ravādār nahīñ hai

be-sud hai guftar jo kirdar nahin hai

kirdar ho to hajat-e-guftar nahin hai

ai dil-jalo ye ashk yahan dekhta hai kaun

ahl-e-jahan ko in se sarokar nahin hai

kya jaane dard-e-dil ki ye duniya hai sang-dil

ye dard yahan laeq-e-izhaar nahin hai

kyun apne dil mein tum liye phirte ho murawwat

is ka jahan mein koi KHaridar nahin hai

sara jahan sameT le to phir bhi tere pas

kuchh bhi nahin jo ek dil-e-bedar nahin hai

duniya mein bahut lazmi hai azm-e-musammam

ye ho to koi marhala dushwar nahin hai

dil mein na dard ho to kahan sha'iri bhi ho

kya dard hi sarmaya-e-ashaar nahin hai

mazlum ki har aah hilati hai 'arsh ko

ye aah to jati kabhi be-kar nahin hai

insaniyat ke dard ka hai tarjuman bashir

ye be-murawwati ka rawadar nahin hai