be-tabi-e-gham-ha-e-darun kam nahin hogi

be-tābī-e-ġham-hā-e-darūñ kam nahīñ hogī

ye aag to ab tum se bhī maddham nahīñ hogī

dāman ko ziyā-e-ruḳh-e-mahtāb se bhar le

ab bārish-e-anvār hai paiham nahīñ hogī

tū hī dil-e-betāb jo so jaa.e to so jaa.e

ye chāñdnī is raat to maddham nahīñ hogī

maiñ un ke liye ġhair huuñ vo mere liye ġhair

achchhā hai ki ab ranjish-e-bāham nahīñ hogī

ham sab ko sunā kar hī raheñge ġham-e-hastī

āvāz kisī shor meñ mudġham nahīñ hogī

ab qāfila-e-zīst hī ruk jaa.e to ruk jaa.e

ye dard kī lazzat to kabhī kam nahīñ hogī

be-tabi-e-gham-ha-e-darun kam nahin hogi

ye aag to ab tum se bhi maddham nahin hogi

daman ko ziya-e-ruKH-e-mahtab se bhar le

ab barish-e-anwar hai paiham nahin hogi

tu hi dil-e-betab jo so jae to so jae

ye chandni is raat to maddham nahin hogi

main un ke liye ghair hun wo mere liye ghair

achchha hai ki ab ranjish-e-baham nahin hogi

hum sab ko suna kar hi rahenge gham-e-hasti

aawaz kisi shor mein mudgham nahin hogi

ab qafila-e-zist hi ruk jae to ruk jae

ye dard ki lazzat to kabhi kam nahin hogi