بے طلب زیست اگرچہ کوئی دشوار نہیں

بے طلب زیست اگرچہ کوئی دشوار نہیں

کون ایسا ہے جو دنیا کا طلب گار نہیں

محفل غیر میں کر حال دل ان سے نہ بیاں

موقع ضبط ہے یہ موقع اظہار نہیں

دوست احباب کا کیا ذکر برے وقتوں میں

موت بھی تو کسی بے کس کی طرف دار نہیں

وقت کے ساتھ بدلتا ہے عزائم اپنے

یعنی انسان خود اپنا ہی وفادار نہیں

حد سے زائد کبھی بڑھتا ہے کبھی ہوتا ہے کم

دل ہے خوددار مگر درد ہی خوددار نہیں

کل تو ٹوٹے ہوئے دل بیچ لئے یاروں نے

آج کا وقت تو یوسف کا خریدار نہیں

خار و گل حسب ضرورت ہیں چمن میں اکملؔ

فطرتوں سے مجھے کچھ ان کی سروکار نہیں