be-talab zist agarche koi dushwar nahin

be-talab ziist agarche koī dushvār nahīñ

kaun aisā hai jo duniyā kā talabgār nahīñ

mahfil-e-ġhair meñ kar hāl-e-dil un se na bayāñ

mauqa-e-zabt hai ye mauqa-e-iz.hār nahīñ

dost ahbāb kā kyā zikr bure vaqtoñ meñ

maut bhī to kisī be-kas kī taraf-dār nahīñ

vaqt ke saath badaltā hai azā.em apne

ya.anī insān ḳhud apnā hī vafādār nahīñ

had se zaa.id kabhī baḌhtā hai kabhī hotā hai kam

dil hai ḳhuddār magar dard hī ḳhuddār nahīñ

kal to TuuTe hue dil bech liye yāroñ ne

aaj kā vaqt to yūsuf kā ḳharīdār nahīñ

ḳhār-o-gul hasb-e-zarūrat haiñ chaman meñ 'akmal'

fitratoñ se mujhe kuchh un kī sarokār nahīñ

be-talab zist agarche koi dushwar nahin

kaun aisa hai jo duniya ka talabgar nahin

mahfil-e-ghair mein kar haal-e-dil un se na bayan

mauqa-e-zabt hai ye mauqa-e-izhaar nahin

dost ahbab ka kya zikr bure waqton mein

maut bhi to kisi be-kas ki taraf-dar nahin

waqt ke sath badalta hai azaem apne

yani insan KHud apna hi wafadar nahin

had se zaid kabhi baDhta hai kabhi hota hai kam

dil hai KHuddar magar dard hi KHuddar nahin

kal to TuTe hue dil bech liye yaron ne

aaj ka waqt to yusuf ka KHaridar nahin

KHar-o-gul hasb-e-zarurat hain chaman mein 'akmal'

fitraton se mujhe kuchh un ki sarokar nahin