be-Thikane hai dil-e-gham-gin Thikane ki kaho

be-Thikāne hai dil-e-ġham-gīñ Thikāne kī kaho

shām-e-hijrāñ dosto kuchh is ke aane kī kaho

haañ na pūchho ik giraftār-e-qafas kī zindagī

ham-safīrān-e-chaman kuchh āshiyāne kī kaho

uḌ gayā hai manzil-e-dushvār meñ ġham kā samand

gesū-e-pur-pech-o-ḳham ke tāziyāne kī kaho

baat bantī aur bātoñ se nazar aatī nahīñ

us nigāh-e-nāz kī bāteñ banāne kī kaho

dāstāñ vo thī jise dil bujhte bujhte kah gayā

sham-e-bazm-e-zindagī ke jhilmilāne kī kaho

kuchh dil-e-marhūm kī bāteñ karo ai ahl-e-ilm

jis se vīrāne the ābād us divāne kī kaho

dāstān-e-zindagī bhī kis qadar dilchasp hai

jo azal se chhiḌ gayā hai us fasāne kī kaho

ye fusūn-e-nīm-e-shab ye ḳhvāb-sāmāñ ḳhāmushī

sāmrī fan aañkh ke jaadū jagāne kī kaho

koī kyā khā.egā yuuñ sachchī qasam jhūTī qasam

us nigāh-e-nāz kī saugandh khāne kī kaho

shaam hī se gosh-bar-āvāz hai bazm-e-suḳhan

kuchh 'firāq' apnī sunāo kuchh zamāne kī kaho

be-Thikane hai dil-e-gham-gin Thikane ki kaho

sham-e-hijran dosto kuchh is ke aane ki kaho

han na puchho ek giraftar-e-qafas ki zindagi

ham-safiran-e-chaman kuchh aashiyane ki kaho

uD gaya hai manzil-e-dushwar mein gham ka samand

gesu-e-pur-pech-o-KHam ke taziyane ki kaho

baat banti aur baaton se nazar aati nahin

us nigah-e-naz ki baaten banane ki kaho

dastan wo thi jise dil bujhte bujhte kah gaya

sham-e-bazm-e-zindagi ke jhilmilane ki kaho

kuchh dil-e-marhum ki baaten karo ai ahl-e-ilm

jis se virane the aabaad us diwane ki kaho

dastan-e-zindagi bhi kis qadar dilchasp hai

jo azal se chhiD gaya hai us fasane ki kaho

ye fusun-e-nim-e-shab ye KHwab-saman KHamushi

samri fan aankh ke jadu jagane ki kaho

koi kya khaega yun sachchi qasam jhuTi qasam

us nigah-e-naz ki saugandh khane ki kaho

sham hi se gosh-bar-awaz hai bazm-e-suKHan

kuchh 'firaq' apni sunao kuchh zamane ki kaho