be-wajh andalib ko KHauf-e-KHizan nahin

be-vaj.h 'andalīb ko ḳhauf-e-ḳhizāñ nahīñ

ujḌā to ban sakegā nayā āshiyāñ nahīñ

kuchh qaid hai jagah kī yahāñ ho vahāñ nahīñ

sajdoñ kā shauq ho to kahāñ āstāñ nahīñ

kaliyoñ meñ rang bhar na sakī to bahār kyā

gul kī qabā na chhīn sakī to ḳhizāñ nahīñ

kyā zulm hai ki jaao ho roz is galī se tum

aao ho bhuul kar bhī hamāre yahāñ nahīñ

jiinā jo chāhiye to zamāne se jang ho

karnā jo chāhiye to koī nauha-ḳhvāñ nahīñ

kyā aap ko paḌī hai jo suniyegā shauq se

zikr-e-amar se baḌh ke mirī dāstāñ nahīñ

vā'iz ke talḳh vaa'z se allāh kī panāh

mat pūchhiye ki zaḳhm kahāñ haiñ kahāñ nahīñ

merī nigāh kaam na de aur baat hai

jalva tirā ba-qadr-e-zarūrat kahāñ nahīñ

ik aap haiñ ki jī meñ jo aa.ī vo kah ga.e

ik ham adab se khol rahe haiñ zabāñ nahīñ

vahshat meñ dekhtā bhī hai dīvāna aap kā

dāman kahāñ nahīñ haiñ garebāñ kahāñ nahīñ

kyā jaane kyā huā ki vo mahfil se uTh ga.e

puurī abhī huī thī mirī dāstāñ nahīñ

dair-o-haram kahīñ na milā vaa.e re nasīb

allāh ham ne tujh ko pukārā kahāñ nahīñ

milte haiñ dair bhī to haram hī ke ās-pās

'bismil' se tum miloge kahāñ aur kahāñ nahīñ

be-wajh 'andalib ko KHauf-e-KHizan nahin

ujDa to ban sakega naya aashiyan nahin

kuchh qaid hai jagah ki yahan ho wahan nahin

sajdon ka shauq ho to kahan aastan nahin

kaliyon mein rang bhar na saki to bahaar kya

gul ki qaba na chhin saki to KHizan nahin

kya zulm hai ki jao ho roz is gali se tum

aao ho bhul kar bhi hamare yahan nahin

jina jo chahiye to zamane se jang ho

karna jo chahiye to koi nauha-KHwan nahin

kya aap ko paDi hai jo suniyega shauq se

zikr-e-amar se baDh ke meri dastan nahin

wa'iz ke talKH wa'z se allah ki panah

mat puchhiye ki zaKHm kahan hain kahan nahin

meri nigah kaam na de aur baat hai

jalwa tera ba-qadr-e-zarurat kahan nahin

ek aap hain ki ji mein jo aai wo kah gae

ek hum adab se khol rahe hain zaban nahin

wahshat mein dekhta bhi hai diwana aap ka

daman kahan nahin hain gareban kahan nahin

kya jaane kya hua ki wo mahfil se uTh gae

puri abhi hui thi meri dastan nahin

dair-o-haram kahin na mila wae re nasib

allah hum ne tujh ko pukara kahan nahin

milte hain dair bhi to haram hi ke aas-pas

'bismil' se tum miloge kahan aur kahan nahin