be-wajh dil-jalon ko jalane se kya gharaz

be-vaj.h dil-jaloñ ko jalāne se kyā ġharaz

matlab hī jab nahīñ to satāne se kyā ġharaz

tum se bigaḌ ga.ī to jahāñ se bigaḌ ga.ī

tum se ġharaz nahīñ to zamāne se kyā ġharaz

manzūr agar nahīñ kashish-e-ishq dekhnā

khīñche se kyā ġharaz hai na aane se kyā ġharaz

jab tum ko vāsta hī nahīñ kuchh raqīb se

phir roz us kī bazm meñ jaane se kyā ġharaz

'shabnam' kī tarah kaun ho nālāñ shab-e-firāq

ham ko kisī kī niiñd uḌāne se kyā ġharaz

be-wajh dil-jalon ko jalane se kya gharaz

matlab hi jab nahin to satane se kya gharaz

tum se bigaD gai to jahan se bigaD gai

tum se gharaz nahin to zamane se kya gharaz

manzur agar nahin kashish-e-ishq dekhna

khinche se kya gharaz hai na aane se kya gharaz

jab tum ko wasta hi nahin kuchh raqib se

phir roz us ki bazm mein jaane se kya gharaz

'shabnam' ki tarah kaun ho nalan shab-e-firaq

hum ko kisi ki nind uDane se kya gharaz