بے وجہ ان سے ترک ملاقات ہو گئی

بے وجہ ان سے ترک ملاقات ہو گئی

دشمن جو چاہتے تھے وہی بات ہو گئی

ہر اک نگاہ وجہ سوالات ہو گئی

دونوں رہے خموش مگر بات ہو گئی

چلمن اٹھا اٹھا کے گراتے رہے جو وہ

دن ہو گیا کبھی تو کبھی رات ہو گئی

الزام بے وفائی کا دیتا ہی کیا جواب

کچھ آنسوؤں کی آنکھ سے برسات ہو گئی

مجھ سے شب فراق کا عالم نہ پوچھیے

جیسے ہزار سال کی اک رات ہو گئی

خفگی کا ان کی حال کسی کو بتائیں کیا

احباب پوچھتے ہیں کہ کیا بات ہو گئی

ہوتے ہی کیسے ان کی تجلی سے فیضیاب

جب تاب دید نذر حجابات ہو گئی

وہ آ گئے تو اتنی خبر بھی نہیں رہی

کب دن گزر گیا رضیؔ کب رات ہو گئی