be-yaqini ke Dar se TuT gae

be-yaqīnī ke Dar se TuuT ga.e

ham jo dast-e-hunar se TuuT ga.e

tum nahīñ jānte ki kitne dil

hādse ke asar se TuuT ga.e

hausle dhuup ne kiye paspā

jism lambe safar se TuuT ga.e

phir hameñ kirchiyāñ dikhāne lagā

ḳhvāb jab ḳhvāb-gar se TuuT ga.e

ek taa.ir kī vāpsī na huī

sabz mausam shajar se TuuT ga.e

kabhī ham chaak tak nahīñ pahuñche

aur kabhī kūza-gar se TuuT ga.e

kyā tilismī nigāh thī kisī kī

log pahlī nazar se TuuT ga.e

silsile sachchī chāhatoñ ke 'safīr'

ek jhūTī ḳhabar se TuuT ga.e

be-yaqini ke Dar se TuT gae

hum jo dast-e-hunar se TuT gae

tum nahin jaante ki kitne dil

hadse ke asar se TuT gae

hausle dhup ne kiye paspa

jism lambe safar se TuT gae

phir hamein kirchiyan dikhane laga

KHwab jab KHwab-gar se TuT gae

ek tair ki wapsi na hui

sabz mausam shajar se TuT gae

kabhi hum chaak tak nahin pahunche

aur kabhi kuza-gar se TuT gae

kya tilismi nigah thi kisi ki

log pahli nazar se TuT gae

silsile sachchi chahaton ke 'safir'

ek jhuTi KHabar se TuT gae