be-zabani ko ata yun bhi zaban hone lagi

be-zabānī ko atā yuuñ bhī zabāñ hone lagī

merī hālat un ke chehre se ayaañ hone lagī

har masarrat har ḳhushī bantī ga.ī tasvīr-e-ġham

dhīre dhīre naġhmagī āh-o-fuġhāñ hone lagī

shab ke Dhalne tak jamī thī mahfil-e-sher-o-suḳhan

aañkh jhapkī thī ki masjid meñ azaañ hone lagī

tere hāthoñ kī mahak hai ab bhī mere haath meñ

terī ḳhushbū merī sāñsoñ meñ ravāñ hone lagī

vaqt-e-ruḳhsat aap ne dī thī duā.eñ mere saath

abr ban kar vo safar meñ sā.ebāñ hone lagī

ḳhaak ban kar un kī galiyoñ meñ pahuñchtā kaash maiñ

merī miTTī bhī lahad meñ rā.egāñ hone lagī

āñkhoñ āñkhoñ hī meñ 'sājid' kah ga.e sab hāl-e-dil

apnī ḳhāmoshī na.ī tarz-e-bayāñ hone lagī

be-zabani ko ata yun bhi zaban hone lagi

meri haalat un ke chehre se ayan hone lagi

har masarrat har KHushi banti gai taswir-e-gham

dhire dhire naghmagi aah-o-fughan hone lagi

shab ke Dhalne tak jami thi mahfil-e-sher-o-suKHan

aankh jhapki thi ki masjid mein azan hone lagi

tere hathon ki mahak hai ab bhi mere hath mein

teri KHushbu meri sanson mein rawan hone lagi

waqt-e-ruKHsat aap ne di thi duaen mere sath

abr ban kar wo safar mein saeban hone lagi

KHak ban kar un ki galiyon mein pahunchta kash main

meri miTTi bhi lahad mein raegan hone lagi

aankhon aankhon hi mein 'sajid' kah gae sab haal-e-dil

apni KHamoshi nai tarz-e-bayan hone lagi