بے زبانی کو عطا یوں بھی زباں ہونے لگی

بے زبانی کو عطا یوں بھی زباں ہونے لگی

میری حالت ان کے چہرے سے عیاں ہونے لگی

ہر مسرت ہر خوشی بنتی گئی تصویر غم

دھیرے دھیرے نغمگی آہ و فغاں ہونے لگی

شب کے ڈھلنے تک جمی تھی محفل شعر و سخن

آنکھ جھپکی تھی کہ مسجد میں اذاں ہونے لگی

تیرے ہاتھوں کی مہک ہے اب بھی میرے ہاتھ میں

تیری خوشبو میری سانسوں میں رواں ہونے لگی

وقت رخصت آپ نے دی تھی دعائیں میرے ساتھ

ابر بن کر وہ سفر میں سائباں ہونے لگی

خاک بن کر ان کی گلیوں میں پہنچتا کاش میں

میری مٹی بھی لحد میں رائیگاں ہونے لگی

آنکھوں آنکھوں ہی میں ساجدؔ کہہ گئے سب حال دل

اپنی خاموشی نئی طرز بیاں ہونے لگی