bebasi se hath apne malne wale hum nahin

bebasī se haath apne malne vaale ham nahīñ

mehrbānī par kisī kī palne vaale ham nahīñ

rahguzar apnī judā hai falsafa apnā alag

jā tire naqsh-e-qadam par chalne vaale ham nahīñ

ek bas dil kā kiyā hai jān-e-jāñ tujh se savāl

dil liye bin tere dar se Talne vaale ham nahīñ

ham ki sūraj kī tarah buzdil nahīñ ai zulmato

tīrgī-e-shab se Dar kar Dhalne vaale ham nahīñ

makr kā unsur hamārī ḳhū meñ pāoge na tum

mīThī bātoñ se kisī ko chhalne vaale ham nahīñ

terī marzī se hī phaltī phūltī hai zindagī

tū na chāhe to ḳhudāyā phalne vaale ham nahīñ

ham ki apnī zaat meñ be-fikr-o-be-parvā haiñ 'shād'

sozish-e-ranj-o-alam meñ jalne vaale ham nahīñ

bebasi se hath apne malne wale hum nahin

mehrbani par kisi ki palne wale hum nahin

rahguzar apni juda hai falsafa apna alag

ja tere naqsh-e-qadam par chalne wale hum nahin

ek bas dil ka kiya hai jaan-e-jaan tujh se sawal

dil liye bin tere dar se Talne wale hum nahin

hum ki suraj ki tarah buzdil nahin ai zulmato

tirgi-e-shab se Dar kar Dhalne wale hum nahin

makr ka unsur hamari KHu mein paoge na tum

miThi baaton se kisi ko chhalne wale hum nahin

teri marzi se hi phalti phulti hai zindagi

tu na chahe to KHudaya phalne wale hum nahin

hum ki apni zat mein be-fikr-o-be-parwa hain 'shad'

sozish-e-ranj-o-alam mein jalne wale hum nahin