becha na humne dil na KHaridar tak gae

bechā na ham ne dil na ḳharīdār tak ga.e

jo kam-ayār the vahī bāzār tak ga.e

vo silsile bhī kitne dil-āvez the ki jo

zanjīr-e-pā se gesū-e-ḳhamdār tak ga.e

thī ham se aage aage vahāñ bhī alam kī dhuup

jab tak ham us ke sāya-e-dīvār tak ga.e

har baar khīñch laa.ī hameñ ġhairat-e-junūñ

sau baar yuuñ to ham bhī dar-e-yār tak ga.e

raste meñ kaun kaun milā kuchh ḳhabar nahīñ

kū-e-sanam se marhala-e-dār tak ga.e

Thahrā na juz tire koī yūsuf nigāh meñ

jaane ko ham bhī misr ke bāzār tak ga.e

TuuTā na ek sang bhī kyā jaane kitne log

tesha-ba-dast dāman-e-kohsār tak ga.e

kitne aziiz haiñ ye masīhā ko kyā ḳhabar

vo zaḳhm-e-dil jo lazzat-e-āzār tak ga.e

ai 'shān' sochtī huuñ ki vo haath kyā hue

jo shāḳh-e-gul ko chhoḌ ke talvār tak ga.e

becha na hum ne dil na KHaridar tak gae

jo kam-ayar the wahi bazar tak gae

wo silsile bhi kitne dil-awez the ki jo

zanjir-e-pa se gesu-e-KHamdar tak gae

thi hum se aage aage wahan bhi alam ki dhup

jab tak hum us ke saya-e-diwar tak gae

har bar khinch lai hamein ghairat-e-junun

sau bar yun to hum bhi dar-e-yar tak gae

raste mein kaun kaun mila kuchh KHabar nahin

ku-e-sanam se marhala-e-dar tak gae

Thahra na juz tere koi yusuf nigah mein

jaane ko hum bhi misr ke bazar tak gae

TuTa na ek sang bhi kya jaane kitne log

tesha-ba-dast daman-e-kohsar tak gae

kitne aziz hain ye masiha ko kya KHabar

wo zaKHm-e-dil jo lazzat-e-azar tak gae

ai 'shan' sochti hun ki wo hath kya hue

jo shaKH-e-gul ko chhoD ke talwar tak gae