بیچا نہ ہم نے دل نہ خریدار تک گئے

بیچا نہ ہم نے دل نہ خریدار تک گئے

جو کم عیار تھے وہی بازار تک گئے

وہ سلسلے بھی کتنے دل آویز تھے کہ جو

زنجیر پا سے گیسوئے خم دار تک گئے

تھی ہم سے آگے آگے وہاں بھی الم کی دھوپ

جب تک ہم اس کے سایۂ دیوار تک گئے

ہر بار کھینچ لائی ہمیں غیرت جنوں

سو بار یوں تو ہم بھی در یار تک گئے

رستے میں کون کون ملا کچھ خبر نہیں

کوئے صنم سے مرحلۂ دار تک گئے

ٹھہرا نہ جز ترے کوئی یوسف نگاہ میں

جانے کو ہم بھی مصر کے بازار تک گئے

ٹوٹا نہ ایک سنگ بھی کیا جانے کتنے لوگ

تیشہ بدست دامن کہسار تک گئے

کتنے عزیز ہیں یہ مسیحا کو کیا خبر

وہ زخم دل جو لذت آزار تک گئے

اے شانؔ سوچتی ہوں کہ وہ ہاتھ کیا ہوئے

جو شاخ گل کو چھوڑ کے تلوار تک گئے