begana-e-har-rahat-o-gham tumne kiya hai

begāna-e-har-rāhat-o-ġham tum ne kiyā hai

mujh par ye karam bhī ba-qasam tum ne kiyā hai

shāista-e-ādāb-e-mohabbat jo nahīñ the

gumrāh unheñ shaiḳh-e-haram tum ne kiyā hai

dīdār ke pyāsoñ se jo kah duuñ to bigaḌ jaa.eñ

badnām mohabbat kā bharam tum ne kiyā hai

thoḌā sā alag haT ke rah-e-ām kī had se

suntā huuñ ki aksar mirā ġham tum ne kiyā hai

rabt-e-nigah-e-dil kā ḳhulāsa jise kahiye

aksar vahī afsānā raqam tum ne kiyā hai

har maslahat-e-vaqt kī chaukhaT pe jhukā ke

insāf kā ḳhuun ahl-e-qalam tum ne kiyā hai

zāhid se 'nihāl' aaj koī pūchh le itnā

sar kyoñ dar-e-mai-ḳhāna pe ḳham tum ne kiyā hai

begana-e-har-rahat-o-gham tum ne kiya hai

mujh par ye karam bhi ba-qasam tum ne kiya hai

shaista-e-adab-e-mohabbat jo nahin the

gumrah unhen shaiKH-e-haram tum ne kiya hai

didar ke pyason se jo kah dun to bigaD jaen

badnam mohabbat ka bharam tum ne kiya hai

thoDa sa alag haT ke rah-e-am ki had se

sunta hun ki aksar mera gham tum ne kiya hai

rabt-e-nigah-e-dil ka KHulasa jise kahiye

aksar wahi afsana raqam tum ne kiya hai

har maslahat-e-waqt ki chaukhaT pe jhuka ke

insaf ka KHun ahl-e-qalam tum ne kiya hai

zahid se 'nihaal' aaj koi puchh le itna

sar kyon dar-e-mai-KHana pe KHam tum ne kiya hai