begana ho ke bazm-e-jahan dekhta hun main

begāna ho ke bazm-e-jahāñ dekhtā huuñ maiñ

duniyā ke rañg-o-bū kā samāñ dekhtā huuñ meñ

raushan-zamīr jaise koī sarf-e-dīd ho.e

yuuñ jalva-hā-e-kaun-o-makāñ dekhtā huuñ meñ

arzāñ hai zulm-o-jaur kī uftādgī magar

jins-o-vafā-o-mehr-e-garāñ dekhtā huuñ maiñ

ik samt jashn-e-shādī-o-hañgāma-e-nishāt

ik samt hashr āh-o-fuġhāñ dekhtā huuñ maiñ

sharh-e-alam darāz hai al-qissa ai 'shakīl'

ik daaġh apne dil meñ nihāñ dekhtā huuñ maiñ

begana ho ke bazm-e-jahan dekhta hun main

duniya ke rang-o-bu ka saman dekhta hun mein

raushan-zamir jaise koi sarf-e-did hoe

yun jalwa-ha-e-kaun-o-makan dekhta hun mein

arzan hai zulm-o-jaur ki uftadgi magar

jins-o-wafa-o-mehr-e-garan dekhta hun main

ek samt jashn-e-shadi-o-hangama-e-nishat

ek samt hashr aah-o-fughan dekhta hun main

sharh-e-alam daraaz hai al-qissa ai 'shakil'

ek dagh apne dil mein nihan dekhta hun main