humne kis din tere kuche mein guzara na kiya

ham ne kis din tire kūche meñ guzārā na kiyā

tū ne ai shoḳh magar kaam hamārā na kiyā

ek hī baar huiiñ vaj.h-e-giraftārī-e-dil

iltifāt un kī nigāhoñ ne dubārā na kiyā

mahfil-e-yār kī rah jā.egī aadhī raunaq

naaz ko us ne agar anjuman-ārā na kiyā

tān-e-ahbāb sune sarzanish-e-ḳhalq sahī

ham ne kyā kyā tirī ḳhātir se gavārā na kiyā

jab diyā tum ne raqīboñ ko diyā jām-e-sharāb

bhuul kar bhī mirī jānib ko ishārā na kiyā

rū-ba-rū chashm-e-tasavvur ke vo har vaqt rahe

na sahī aañkh ne gar un kā nazārā na kiyā

gar yahī hai sitam-e-yār to ham ne 'hasrat'

na kiyā kuchh bhī jo duniyā se kinārā na kiyā

hum ne kis din tere kuche mein guzara na kiya

tu ne ai shoKH magar kaam hamara na kiya

ek hi bar huin wajh-e-giraftari-e-dil

iltifat un ki nigahon ne dubara na kiya

mahfil-e-yar ki rah jaegi aadhi raunaq

naz ko us ne agar anjuman-ara na kiya

tan-e-ahbab sune sarzanish-e-KHalq sahi

hum ne kya kya teri KHatir se gawara na kiya

jab diya tum ne raqibon ko diya jam-e-sharab

bhul kar bhi meri jaanib ko ishaara na kiya

ru-ba-ru chashm-e-tasawwur ke wo har waqt rahe

na sahi aankh ne gar un ka nazara na kiya

gar yahi hai sitam-e-yar to hum ne 'hasrat'

na kiya kuchh bhi jo duniya se kinara na kiya