mujhe sahl ho gain manzilen wo hawa ke ruKH bhi badal gae

mujhe sahl ho ga.iiñ manzileñ vo havā ke ruḳh bhī badal ga.e

tirā haath haath meñ aa gayā ki charāġh raah meñ jal ga.e

vo lajā.e mere savāl par ki uThā sake na jhukā ke sar

uḌī zulf chehre pe is tarah ki shaboñ ke raaz machal ga.e

vahī baat jo vo na kah sake mire sher-o-naġhma meñ aa ga.ī

vahī lab na maiñ jinheñ chhū sakā qadah-e-sharāb meñ Dhal ga.e

vahī āstāñ hai vahī jabīñ vahī ashk hai vahī āstīñ

dil-e-zār tū bhī badal kahīñ ki jahāñ ke taur badal ga.e

tujhe chashm-e-mast pata bhī hai ki shabāb garmī-e-bazm hai

tujhe chashm-e-mast ḳhabar bhī hai ki sab ābgīne pighal ga.e

mire kaam aa ga.iiñ āḳhirash yahī kāvisheñ yahī gardisheñ

baḌhīñ is qadar mirī manzileñ ki qadam ke ḳhaar nikal ga.e

mujhe sahl ho gain manzilen wo hawa ke ruKH bhi badal gae

tera hath hath mein aa gaya ki charagh rah mein jal gae

wo lajae mere sawal par ki uTha sake na jhuka ke sar

uDi zulf chehre pe is tarah ki shabon ke raaz machal gae

wahi baat jo wo na kah sake mere sher-o-naghma mein aa gai

wahi lab na main jinhen chhu saka qadah-e-sharab mein Dhal gae

wahi aastan hai wahi jabin wahi ashk hai wahi aastin

dil-e-zar tu bhi badal kahin ki jahan ke taur badal gae

tujhe chashm-e-mast pata bhi hai ki shabab garmi-e-bazm hai

tujhe chashm-e-mast KHabar bhi hai ki sab aabgine pighal gae

mere kaam aa gain aaKHirash yahi kawishen yahi gardishen

baDhin is qadar meri manzilen ki qadam ke KHar nikal gae