beja si hasraton ne tamasha kiya mujhe

bejā sī hasratoñ ne tamāshā kiyā mujhe

ḳhud merī vahshatoñ ne hī rusvā kiyā mujhe

jab dastaras meñ thā to na kī lutf kī nigāh

phir saarī umr logoñ se pūchhā kiyā mujhe

is daur meñ daroġh ne paayā hai kyā faroġh

go haq pe thā maiñ jhūToñ ne jhūTā kiyā mujhe

aksar jo hukmarāñ haiñ vo muuzī sarisht haiñ

mālik ye kaise daur meñ paidā kiyā mujhe

hālāt ne vajūd mirā masḳh kar diyā

vo mere saath ho ke bhī DhūñDā kiyā mujhe

ab kuchh bhī merī zaat meñ zaatī nahīñ rahā

kuchh yuuñ nizām-e-nau ne barahnā kiyā mujhe

'shārib' ajab sukūn hai jab se sunā hai ye

aariz pe dhar ke haath vo sochā kiyā mujhe

beja si hasraton ne tamasha kiya mujhe

KHud meri wahshaton ne hi ruswa kiya mujhe

jab dastaras mein tha to na ki lutf ki nigah

phir sari umr logon se puchha kiya mujhe

is daur mein darogh ne paya hai kya farogh

go haq pe tha main jhuTon ne jhuTa kiya mujhe

aksar jo hukmaran hain wo muzi sarisht hain

malik ye kaise daur mein paida kiya mujhe

haalat ne wajud mera masKH kar diya

wo mere sath ho ke bhi DhunDa kiya mujhe

ab kuchh bhi meri zat mein zati nahin raha

kuchh yun nizam-e-nau ne barahna kiya mujhe

'shaarib' ajab sukun hai jab se suna hai ye

aariz pe dhar ke hath wo socha kiya mujhe