بے کار گئی ہے مری تقدیر ہمیشہ

بے کار گئی ہے مری تقدیر ہمیشہ

خاموش رہی ہے تری تصویر ہمیشہ

میں کرتا رہا عیش کی تدبیر ہمیشہ

اور غم مجھے دیتی رہی تقدیر ہمیشہ

گردن میں رہا طوق گلو گیر ہمیشہ

اور پاؤں میں دیوانے کے زنجیر ہمیشہ

ان آنکھوں نے دیکھی تری تنویر ہمیشہ

دل میں رہی ظالم تری تصویر ہمیشہ

مجروح نظر آتی ہے ہر ایک تمنا

کیا دل پہ مرے چلتی ہے شمشیر ہمیشہ

عالم میں وہ لذت کش بیداد ہیں ہم بھی

دل اپنا رہا منتظر تیر ہمیشہ

ہونے نہ دیا اس نے کبھی دست بساماں

دشمن ہی رہا یہ فلک پیر ہمیشہ

آمادۂ بیداد رہے آٹھ پہر وہ

فریاد کی الٹی رہی تاثیر ہمیشہ

حاصل ہو مجھے ملک جو اقلیم سخن کی

سرمایۂ نازش ہو یہ جاگیر ہمیشہ

بر آئیں مرادیں مری مسعودؔ بہ دقت

پورے ہوئے ارمان بتا خیر ہمیشہ