bekar gai hai meri taqdir hamesha

bekār ga.ī hai mirī taqdīr hamesha

ḳhāmosh rahī hai tirī tasvīr hamesha

maiñ kartā rahā aish kī tadbīr hamesha

aur ġham mujhe detī rahī taqdīr hamesha

gardan meñ rahā tauq-e-gulū-gīr hamesha

aur paañv meñ dīvāne ke zanjīr hamesha

in āñkhoñ ne dekhī tirī tanvīr hamesha

dil meñ rahī zālim tirī tasvīr hamesha

majrūh nazar aatī hai har ek tamanna

kyā dil pe mire chaltī hai shamshīr hamesha

aalam meñ vo lazzat-kash-e-bedād haiñ ham bhī

dil apnā rahā muntazir-e-tīr hamesha

hone na diyā us ne kabhī dast-basāmāñ

dushman hī rahā ye falak-e-pīr hamesha

āmāda-e-be-dād rahe aaTh pahar vo

fariyād kī ulTī rahī tāsīr hamesha

hāsil ho mujhe mulk jo iqlīm-e-suḳhan kī

sarmāya-e-nāzish ho ye jāgīr hamesha

bar aa.iiñ murādeñ mirī 'mas.ūd' ba-diqqat

puure hue armān batā ḳhair hamesha

bekar gai hai meri taqdir hamesha

KHamosh rahi hai teri taswir hamesha

main karta raha aish ki tadbir hamesha

aur gham mujhe deti rahi taqdir hamesha

gardan mein raha tauq-e-gulu-gir hamesha

aur panw mein diwane ke zanjir hamesha

in aankhon ne dekhi teri tanwir hamesha

dil mein rahi zalim teri taswir hamesha

majruh nazar aati hai har ek tamanna

kya dil pe mere chalti hai shamshir hamesha

aalam mein wo lazzat-kash-e-bedad hain hum bhi

dil apna raha muntazir-e-tir hamesha

hone na diya us ne kabhi dast-basaman

dushman hi raha ye falak-e-pir hamesha

aamada-e-be-dad rahe aaTh pahar wo

fariyaad ki ulTi rahi tasir hamesha

hasil ho mujhe mulk jo iqlim-e-suKHan ki

sarmaya-e-nazish ho ye jagir hamesha

bar aain muraden meri 'masud' ba-diqqat

pure hue arman bata KHair hamesha