bekasi-e-shab-e-hijran ki mujhe tab nahin

bekasī-e-shab-e-hijrāñ kī mujhe taab nahīñ

kaash dushman hī chale aa.eñ jo ahbāb nahīñ

tujh ko ai baḳht-e-siyah aag lagā kar dekhūñ

shab-e-hijrāñ meñ agar jalva-e-mahtāb nahīñ

dekh but-ḳhāne meñ tasvīr kā aalam ai shaiḳh

yaañ musallā nahīñ mimbar nahīñ mehrāb nahīñ

nāma-bar mujh se ye kahtā hai ki tum to kyā ho

bādshah bhī to vahāñ qābil-e-alqāb nahīñ

na mile mujh ko mire haal pe rone vaale

aish kaisā ki yahāñ ġham ke bhī asbāb nahīñ

hāl-e-dil jis se kahā us ne kahā bas ḳhāmosh

'dāġh' is dard ke sunñe kī hameñ taab nahīñ

bekasi-e-shab-e-hijran ki mujhe tab nahin

kash dushman hi chale aaen jo ahbab nahin

tujh ko ai baKHt-e-siyah aag laga kar dekhun

shab-e-hijran mein agar jalwa-e-mahtab nahin

dekh but-KHane mein taswir ka aalam ai shaiKH

yan musalla nahin mimbar nahin mehrab nahin

nama-bar mujh se ye kahta hai ki tum to kya ho

baadshah bhi to wahan qabil-e-alqab nahin

na mile mujh ko mere haal pe rone wale

aish kaisa ki yahan gham ke bhi asbab nahin

haal-e-dil jis se kaha us ne kaha bas KHamosh

'dagh' is dard ke sunne ki hamein tab nahin