bekasi mein jo yaad ghar aaya

bekasī meñ jo yaad ghar aayā

aañkh ke saath dil bhī bhar aayā

merī manzil na terā ghar aayā

mere hisse meñ bas safar aayā

ik parī-vash ḳhayāl par aayā

ek saaya sā mujh meñ dar aayā

maiñ ne bai.at se kar diyā inkār

ab ke neze pe merā sar aayā

zindagī jab zavāl par aa.ī

fan mirā tab uruuj par aayā

ḳhūn-e-dil se idhar ġhazal likkhī

naqsh terā udhar ubhar aayā

shīsh-mahloñ ke bhī muqaddar meñ

āḳhirash dekhiye khañDar aayā

ḳhud-kalāmī masīh-e-jān banī

koī monis na chāragar aayā

ek bas dil hī thā mirā apnā

jo tire rāste meñ dhar aayā

kab milā mujh ko sañg-e-mīl tirā

maiñ har ik raah se guzar aayā

dar thā ummīd kā khulā 'hassān'

sub.h kā bhūlā shaam ghar aayā

bekasi mein jo yaad ghar aaya

aankh ke sath dil bhi bhar aaya

meri manzil na tera ghar aaya

mere hisse mein bas safar aaya

ek pari-wash KHayal par aaya

ek saya sa mujh mein dar aaya

main ne baiat se kar diya inkar

ab ke neze pe mera sar aaya

zindagi jab zawal par aai

fan mera tab uruj par aaya

KHun-e-dil se idhar ghazal likkhi

naqsh tera udhar ubhar aaya

shish-mahlon ke bhi muqaddar mein

aaKHirash dekhiye khanDar aaya

KHud-kalami masih-e-jaan bani

koi monis na chaaragar aaya

ek bas dil hi tha mera apna

jo tere raste mein dhar aaya

kab mila mujh ko sang-e-mil tera

main har ek rah se guzar aaya

dar tha ummid ka khula 'hassan'

subh ka bhula sham ghar aaya