betab hun bebak hun is se bhi siwa hun

betāb huuñ bebāk huuñ is se bhī sivā huuñ

ḳhākī huuñ magar kaun sī miTTī kā banā huuñ

aayā hai agar vaqt to suulī pe chaḌhā huuñ

injīl-e-mohabbat kā maiñ kirdār rahā huuñ

maiñ dajla-e-kohsār huuñ sailāb-numā huuñ

sarkash huuñ magar ūñchī chaTānoñ meñ ghirā huuñ

aurāq-e-dabistāñ meñ ye sarsabz manāzir

pazhmurda kitāboñ meñ kise dekh rahā huuñ

maiñ aaj bhī huuñ lāla-e-firdaus-e-ma'ānī

lekin ye musībat hai ki sahrā meñ khilā huuñ

palTā huuñ to khulne lage maazī ke darīche

manzil ne qadam mere liye haiñ jo baḌhā huuñ

un ko bhī hai shiddat se mulāqāt kī ḳhvāhish

ik 'umr se har samt jinheñ DhūñD rahā huuñ

hassās balā kā huuñ magar vaqt-e-tahammul

mā'lūm ye hotā hai ki patthar kā banā huuñ

yaad aa.ī to mahsūs huā jaise koī chiiz

rakh dī hai kisī taaq pe aur bhuul gayā huuñ

mujh se hī 'ibārat hai ye sar-garmī-e-'ālam

maiñ sīna-e-getī ke dhaḌakne kī sadā huuñ

andāz-e-suḳhan laakh badaltā rahe 'māhir'

har haal meñ shā'ir huuñ mohabbat kī sadā huuñ

betab hun bebak hun is se bhi siwa hun

KHaki hun magar kaun si miTTi ka bana hun

aaya hai agar waqt to suli pe chaDha hun

injil-e-mohabbat ka main kirdar raha hun

main dajla-e-kohsar hun sailab-numa hun

sarkash hun magar unchi chaTanon mein ghira hun

auraq-e-dabistan mein ye sarsabz manazir

pazhmurda kitabon mein kise dekh raha hun

main aaj bhi hun lala-e-firdaus-e-ma'ani

lekin ye musibat hai ki sahra mein khila hun

palTa hun to khulne lage mazi ke dariche

manzil ne qadam mere liye hain jo baDha hun

un ko bhi hai shiddat se mulaqat ki KHwahish

ek 'umr se har samt jinhen DhunD raha hun

hassas bala ka hun magar waqt-e-tahammul

ma'lum ye hota hai ki patthar ka bana hun

yaad aai to mahsus hua jaise koi chiz

rakh di hai kisi taq pe aur bhul gaya hun

mujh se hi 'ibarat hai ye sar-garmi-e-'alam

main sina-e-geti ke dhaDakne ki sada hun

andaz-e-suKHan lakh badalta rahe 'mahir'

har haal mein sha'ir hun mohabbat ki sada hun